Linux serverda GitLab'ni Docker konteynerida ishga tushirish

Shaxsiy loyihalaringiz uchun GitHub yoki GitLab.com'ga pul to'lashning o'rniga, o'z serveringizda to'liq GitLab ishga tushirsangiz bo'ladi: cheksiz shaxsiy repozitoriylar, CI/CD, container registry — hammasi sizniki, kodingiz esa o'z diskingizda qoladi.

Bu qo'llanmada nol holatdagi Linux serverdan boshlab, domenga ulangan, HTTPS bilan ishlaydigan GitLab CE'ni Docker konteynerlarida ko'taramiz.

Nima quramiz

Komponent	Vazifasi	Qayerda ishlaydi
GitLab CE	asosiy ilova (web, git, CI koordinatori)	konteyner, `127.0.0.1:8080`
PostgreSQL 17	GitLab bazasi	konteyner, port ochilmaydi
GitLab Runner	CI job'larini bajaradi	konteyner (ixtiyoriy)
nginx	domen, TLS, proksi	serverning o'zida, konteynerda emas

GitLab'ning o'zida ham ichki nginx va ichki postgres bor. Biz ikkalasini ham chetlab o'tamiz: baza alohida konteynerga chiqariladi (versiyani o'zingiz boshqarasiz, backup olish oson), TLS esa serverdagi nginx zimmasida qoladi — chunki odatda bitta serverda bir nechta sayt turadi va 80/443 portlari bitta proksiga tegishli bo'lgani ma'qul.

Talablar

	Minimal	Tavsiya etiladi
RAM	4 GB	8 GB
CPU	2 yadro	4 yadro
Disk	20 GB	50 GB+
OS	Ubuntu 22.04 / Debian 12	—

Bulardan tashqari kerak bo'ladi:

Domen — masalan gitlab.example.com, DNS'da serveringiz IP'siga A yozuvi bilan yo'naltirilgan bo'lishi shart. Sertifikat aynan shu orqali olinadi.
80 va 443 portlari ochiq bo'lishi kerak (sertifikat olish uchun 80 majburiy).
root huquqi (sudo).

⚠️ 4 GB da ishlaydi, lekin qiynaladi. GitLab bir vaqtning o'zida bir nechta Ruby jarayonini ko'taradi. Quyidagi konfiguratsiyada resurslar ataylab kamaytirilgan, shunga qaramay 4 GB'lik serverda swap yoqib qo'yishni tavsiya qilaman.

1-qadam. Serverni tayyorlash

Paketlarni yangilab olamiz:

bash

sudo apt update && sudo apt upgrade -y

2-qadam. Docker'ni o'rnatish

Docker allaqachon bo'lsa, bu bo'limni o'tkazib yuboring:

bash

docker --version

2.1. Kerakli paketlar va GPG kaliti

bash

sudo apt install -y ca-certificates curl
sudo install -m 0755 -d /etc/apt/keyrings
sudo curl -fsSL https://download.docker.com/linux/ubuntu/gpg -o /etc/apt/keyrings/docker.asc
sudo chmod a+r /etc/apt/keyrings/docker.asc

Debian uchun: bu yerda va keyingi buyruqda linux/ubuntu o'rniga linux/debian deb yozing.

2.2. Repozitoriyni ro'yxatga olish

bash

sudo tee /etc/apt/sources.list.d/docker.sources <<EOF
Types: deb
URIs: https://download.docker.com/linux/ubuntu
Suites: $(. /etc/os-release && echo "${UBUNTU_CODENAME:-$VERSION_CODENAME}")
Components: stable
Architectures: $(dpkg --print-architecture)
Signed-By: /etc/apt/keyrings/docker.asc
EOF

2.3. Docker Engine'ni o'rnatish

bash

sudo apt update
sudo apt install -y docker-ce docker-ce-cli containerd.io docker-buildx-plugin docker-compose-plugin

2.4. Ishga tushirish va tekshirish

bash

sudo systemctl enable --now docker
sudo systemctl status docker

enable --now xizmatni darhol ishga tushiradi va server qayta yuklanganda avtomatik ko'tarilishini ta'minlaydi. active (running) ko'rinsa, Docker tayyor.

2.5. O'zingizni `docker` guruhiga qo'shish

bash

sudo usermod -aG docker $USER

⚠️ Busiz har bir docker buyrug'iga sudo yozishga majbur bo'lasiz. O'zgarish kuchga kirishi uchun sessiyadan chiqib, qayta kiring (exit va yana ssh), aks holda permission denied xatosi chiqaveradi.

Bu guruh amalda root huquqiga teng: docker buyrug'i bor odam host'ning istalgan faylini konteyner orqali o'qiy oladi. Shaxsiy serverda muammo emas, lekin bilib qo'ygan ma'qul.

3-qadam. Katalog tuzilmasini tashkil qilish

Konteynerlar bilan ishlaganda barcha fayllarni bitta ildiz katalog ostida saqlash uzoq muddatda ancha qulaylik beradi. Men serverdagi hamma narsani /volumes ichiga joylashtiraman.

Afzalligi ko'chirishda bilinadi: serverni almashtirish kerak bo'lsa, rsync yoki scp bilan butun /volumes ni yangi serverga nusxalash va u yerda docker compose up -d qilish yetarli.

/volumes
├── configs/       # konfiguratsiya fayllari va .env fayllar
├── data/          # ilovalarning doimiy ma'lumotlari
└── server-stack/  # ilovalarning source kodlari va compose fayllari

Katalog	Nima yotadi
`configs`	konfiguratsiya va `.env` fayllar
`data`	baza, yuklangan fayllar — konteyner o'chsa ham qoladigan hamma narsa
`server-stack`	`docker-compose.yaml` va source kodlar

bash

sudo mkdir -p /volumes/{configs,data,server-stack}

Eslatma: server-stack majburiy emas — tayyor image'lar orqali ham deploy qilish mumkin. Ammo kodni shu yerda saqlash deploy jarayonini sezilarli yengillashtiradi.

4-qadam. GitLab fayllarini yaratish

Bundan keyingi buyruqlar /volumes ichida ishlaydi, u esa root'niki. Shuning uchun root sessiyasiga o'tib olamiz — aks holda permission denied bilan to'qnashasiz:

bash

sudo -i

4.1. Kataloglar

bash

mkdir -p /volumes/data/gitlab-ce
mkdir -p /volumes/server-stack/gitlab-ce/initdb

4.2. Extension'lar uchun SQL fayl

GitLab ishga tushishidan oldin bazada bir nechta PostgreSQL kengaytmasi mavjud bo'lishi shart. Rasmiy postgres image'i /docker-entrypoint-initdb.d papkasidagi .sql fayllarni baza birinchi marta yaratilayotganda o'zi bajaradi — shu qulaylikdan foydalanamiz:

bash

cat > /volumes/server-stack/gitlab-ce/initdb/01-extensions.sql <<'SQL'
CREATE EXTENSION IF NOT EXISTS plpgsql;
CREATE EXTENSION IF NOT EXISTS pg_trgm;
CREATE EXTENSION IF NOT EXISTS btree_gist;
CREATE EXTENSION IF NOT EXISTS btree_gin;
SQL

⚠️ Bu skript faqat baza birinchi marta yaratilayotganda — ya'ni /volumes/data/gitlab-ce/postgres bo'sh bo'lganda — ishlaydi. Postgres konteynerini allaqachon ko'targan bo'lsangiz, fayl e'tiborsiz qoladi va kengaytmalarni qo'lda qo'shish kerak:
bash
docker exec -i gitlab-ce-postgres psql -U gitlab -d gitlabhq_production -c "CREATE EXTENSION IF NOT EXISTS pg_trgm; CREATE EXTENSION IF NOT EXISTS btree_gist; CREATE EXTENSION IF NOT EXISTS btree_gin;"

4.3. `docker-compose.yaml`

bash

vim /volumes/server-stack/gitlab-ce/docker-compose.yaml

Ichiga quyidagini joylashtiramiz:

yaml

# Bu fayl yonida `.env` turishi kerak — pastdagi 4.4-bo'limga qarang.
# Domen va TLS host'dagi nginx zimmasida (6-qadam): konteyner faqat
# 127.0.0.1:8080 ga chiqadi.

services:
  gitlab-ce-postgres:
    image: postgres:17.11
    container_name: gitlab-ce-postgres
    hostname: gitlab-ce-postgres
    restart: unless-stopped
    stop_grace_period: 1m
    environment:
      # POSTGRES_USER rasmiy image'da superuser bo'ladi. Bu ataylab:
      # GitLab'ga kerak bo'lgan extension'lar superuser talab qiladi.
      POSTGRES_USER: gitlab
      POSTGRES_PASSWORD: ${GITLAB_DB_PASSWORD}
      POSTGRES_DB: gitlabhq_production
      POSTGRES_INITDB_ARGS: "--encoding=UTF8 --locale=C --data-checksums"
      # ⚠️ postgres:18 da standart PGDATA o'zgargan va bind-mount JIMGINA
      # e'tiborsiz qoladi — baza konteyner ichiga yozilib, keyingi
      # `up -d` da yo'qoladi. Aniq yozib qo'yish kelajakda ham himoya qiladi.
      PGDATA: /var/lib/postgresql/data
      TZ: UTC
      PGTZ: UTC
    volumes:
      - /volumes/data/gitlab-ce/postgres:/var/lib/postgresql/data
      # Extension'lar shu yerdan o'rnatiladi (faqat birinchi startda).
      - /volumes/server-stack/gitlab-ce/initdb:/docker-entrypoint-initdb.d:ro
    networks:
      - gitlab-db
    shm_size: 256mb
    healthcheck:
      test: ["CMD-SHELL", "pg_isready -U gitlab -d gitlabhq_production"]
      interval: 10s
      timeout: 5s
      retries: 5
      start_period: 30s
    logging:
      driver: json-file
      options:
        max-size: "10m"
        max-file: "3"
    deploy:
      resources:
        limits:
          memory: 1g
    command:
      - "postgres"
      - "-c"
      - "max_connections=200"
      - "-c"
      - "shared_buffers=256MB"
      - "-c"
      - "effective_cache_size=768MB"
      - "-c"
      - "work_mem=8MB"
      - "-c"
      - "maintenance_work_mem=128MB"
      - "-c"
      - "random_page_cost=1.1"

  gitlab-ce:
    image: gitlab/gitlab-ce:19.3.1-ce.0
    container_name: gitlab-ce
    # Bu qiymat email va klon URL'lariga tushadi — haqiqiy domen bo'lsin.
    hostname: ${GITLAB_HOST}
    restart: unless-stopped
    # GitLab sekin o'chadi; kam bersangiz SIGKILL bilan o'ladi va keyingi
    # startda postgres recovery qilishga majbur bo'ladi.
    stop_grace_period: 5m
    shm_size: 256m
    environment:
      TZ: UTC
      # Omnibus bu blokni HAR STARTDA o'qib, gitlab.rb ga qo'llaydi.
      GITLAB_OMNIBUS_CONFIG: |
        external_url 'https://${GITLAB_HOST}'
        gitlab_rails['time_zone'] = 'UTC'

        # ⚠️ Kalit nomiga e'tibor: server sozlamalari
        # `gitlab_rails['nginx'][...]` ostida. Yalang'och `nginx['listen_port']`
        # deb yozsangiz JIMGINA e'tiborsiz qoladi.
        # Bu 80 — konteyner ICHIDAGI port.
        gitlab_rails['nginx']['listen_port'] = 80
        gitlab_rails['nginx']['listen_https'] = false
        gitlab_rails['nginx']['redirect_http_to_https'] = false

        # Busiz loglarda va "oxirgi kirish IP" da docker shlyuzi ko'rinadi,
        # foydalanuvchining haqiqiy IP'si emas.
        gitlab_rails['nginx']['real_ip_trusted_addresses'] = ['10.0.0.0/8', '172.16.0.0/12', '192.168.0.0/16']

        # TLS'ni nginx uzadi; busiz GitLab o'zi sertifikat olmoqchi bo'ladi.
        letsencrypt['enable'] = false

        # ⚠️ Quyidagi `ports:` dagi SSH porti bilan AYNAN bir xil bo'lsin,
        # aks holda GitLab noto'g'ri klon URL'ini ko'rsatadi.
        gitlab_rails['gitlab_shell_ssh_port'] = ${GITLAB_SSH_PORT:-2222}

        # ── Tashqi postgres ──────────────────────────────────────────────
        postgresql['enable'] = false          # ichki postgres o'chirilgan
        gitlab_rails['db_adapter'] = 'postgresql'
        gitlab_rails['db_encoding'] = 'unicode'
        gitlab_rails['db_host'] = 'gitlab-ce-postgres'   # konteyner nomi
        gitlab_rails['db_port'] = 5432
        gitlab_rails['db_database'] = 'gitlabhq_production'
        gitlab_rails['db_username'] = 'gitlab'
        gitlab_rails['db_password'] = '${GITLAB_DB_PASSWORD}'
        gitlab_rails['db_sslmode'] = 'disable'

        # ── Kichik server uchun resurs kamaytirish ───────────────────────
        puma['worker_processes'] = 2
        puma['min_threads'] = 1
        puma['max_threads'] = 4
        sidekiq['concurrency'] = 9          # ⚠️ 'max_concurrency' EMAS

        prometheus_monitoring['enable'] = false   # ~300 MB RAM tejaydi
        gitlab_kas['enable'] = false
        registry['enable'] = false
        gitlab_pages['enable'] = false

        gitlab_rails['backup_keep_time'] = 604800   # ichki backup, 7 kun
    volumes:
      # ⚠️ Bu yerdagi gitlab-secrets.json YO'QOLSA — 2FA, CI o'zgaruvchilari
      # va saqlangan tokenlar qaytarib bo'lmas darajada ochilmay qoladi.
      - /volumes/data/gitlab-ce/config:/etc/gitlab
      - /volumes/data/gitlab-ce/logs:/var/log/gitlab
      - /volumes/data/gitlab-ce/data:/var/opt/gitlab
    ports:
      # Web: 127.0.0.1 ga bog'langan, ya'ni internetdan ko'rinmaydi —
      # unga faqat shu serverdagi nginx kira oladi.
      # nginx boshqa mashinada bo'lsa `127.0.0.1:` ni olib tashlang.
      - "127.0.0.1:${GITLAB_HTTP_PORT:-8080}:80"
      # Git-over-SSH. 22 emas — u host'ning o'z sshd'siniki.
      # ⚠️ Docker DNAT ufw'dan oldin ishlaydi, ya'ni bu portni ufw bilan
      # yopa olmaysiz. Kerak bo'lmasa shu qatorni o'chiring (HTTPS orqali
      # klon qilish baribir ishlayveradi).
      - "${GITLAB_SSH_PORT:-2222}:22"
    networks:
      - gitlab-db
    depends_on:
      gitlab-ce-postgres:
        # GitLab startda migratsiyalarni ishga tushiradi — baza tayyor
        # bo'lmasa yiqiladi.
        condition: service_healthy
    healthcheck:
      # ⚠️ Image'ning o'z healthcheck'i YOLG'ON YASHIL beradi: web umuman
      # ko'tarilmagan holatda ham `docker ps` da `healthy` ko'rinadi.
      # Shuning uchun to'g'ridan-to'g'ri HTTP so'raladi.
      test: ["CMD", "/opt/gitlab/embedded/bin/curl", "-fsS", "-o", "/dev/null",
             "http://127.0.0.1:80/-/health"]
      interval: 60s
      timeout: 30s
      retries: 5
      # ⚠️ Birinchi start 5-10 daqiqa (reconfigure + migratsiyalar).
      start_period: 15m
    logging:
      driver: json-file
      options:
        max-size: "50m"
        max-file: "5"
    deploy:
      resources:
        limits:
          # Rasmiy tavsiya 16 GB; yuqoridagi kamaytirishlar bilan GitLab
          # odatda ~4 GB atrofida turadi. 6g — shift, kafolat emas.
          memory: 6g

  gitlab-runner:
    image: gitlab/gitlab-runner:alpine-v19.3.1   # GitLab bilan bir xil major
    container_name: gitlab-ce-runner
    hostname: gitlab-ce-runner
    restart: unless-stopped
    depends_on:
      - gitlab-ce
    environment:
      TZ: UTC
    volumes:
      - /volumes/data/gitlab-ce/runner:/etc/gitlab-runner
      # ⚠️ Bu qator xavfli: docker executor job'larni HOST demoni orqali
      # ishga tushiradi, ya'ni .gitlab-ci.yml ga kod yoza oladigan har kim
      # amalda host'da root. Repolaringiz shaxsiy bo'lsa maqbul; aks holda
      # dind (docker-in-docker) variantini ko'ring.
      # CI kerak bo'lmasa — butun `gitlab-runner` servisini o'chirib
      # tashlang, GitLab busiz ham to'liq ishlaydi.
      - /var/run/docker.sock:/var/run/docker.sock
    networks:
      # Ataylab GitLab bilan bir tarmoqda emas — runner GitLab'ga public
      # https://${GITLAB_HOST} orqali boradi.
      - gitlab-ci
    logging:
      driver: json-file
      options:
        max-size: "10m"
        max-file: "3"
    deploy:
      resources:
        limits:
          # Job konteynerlari bu limitga KIRMAYDI — ular alohida tug'iladi.
          memory: 512m

networks:
  gitlab-ci:
    name: gitlab-ci
    driver: bridge
  gitlab-db:
    name: gitlab-db
    driver: bridge

4.4. `.env` fayli

Compose ichidagi ${GITLAB_HOST} kabi qiymatlar .env faylidan olinadi. Docker Compose bu faylni compose fayli turgan papkadan o'zi topib o'qiydi — alohida ko'rsatish shart emas, nomi aynan .env bo'lsa kifoya.

Avval baza uchun parol generatsiya qilamiz:

bash

openssl rand -hex 24

So'ng faylni yaratamiz:

bash

vim /volumes/server-stack/gitlab-ce/.env

bash

GITLAB_HOST=gitlab.example.com
GITLAB_DB_PASSWORD=yuqorida-generatsiya-qilingan-parol
GITLAB_HTTP_PORT=8080
GITLAB_SSH_PORT=2222

O'zgaruvchi	Majburiymi	Nima uchun
`GITLAB_HOST`	ha	GitLab ochiladigan domen. DNS'da serveringiz IP'siga yo'naltirilgan bo'lsin
`GITLAB_DB_PASSWORD`	ha	postgres paroli. Baza birinchi ko'tarilishda aynan shu parol bilan yaratiladi
`GITLAB_HTTP_PORT`	yo'q (8080)	nginx proksi qiladigan port. 8080 band bo'lsa boshqasini yozing
`GITLAB_SSH_PORT`	yo'q (2222)	`git clone ssh://...` uchun port. 22 ni yozmang — u serverning o'z SSH'iniki

Faylda parol borligi uchun ruxsatni cheklaymiz:

bash

chmod 600 /volumes/server-stack/gitlab-ce/.env

⚠️ Parolni keyin o'zgartirsangiz. Baza allaqachon eski parol bilan yaratilgan bo'ladi va .env ni tahrirlash unga ta'sir qilmaydi — GitLab ulanolmay qoladi. Parolni bazada ham almashtirish kerak:
bash
docker exec -it gitlab-ce-postgres psql -U gitlab -d gitlabhq_production \
  -c "ALTER USER gitlab WITH PASSWORD 'yangi-parol';"
Va albatta: .env ni hech qachon git'ga qo'shmang.

5-qadam. Ishga tushirish

bash

cd /volumes/server-stack/gitlab-ce
docker compose up -d

Birinchi start 5-10 daqiqa davom etadi: GitLab bu vaqtda reconfigure qiladi va baza migratsiyalarini bajaradi. Kuzatib turish uchun:

bash

docker compose logs -f gitlab-ce

Loglarda Configuration complete qatorini kutamiz. Holatni ko'rish:

bash

docker ps --format 'table {{.Names}}\t{{.Status}}'

gitlab-ce avvaliga health: starting bo'lib turadi — bu normal. nginx'ga o'tishdan oldin konteynerning o'zini tekshiramiz:

bash

curl -s -o /dev/null -w '%{http_code}\n' http://127.0.0.1:8080/-/health

200 qaytsa, GitLab tayyor. 502 yoki bo'sh javob kelsa — hali ko'tarilmagan, kutasiz.

6-qadam. nginx va HTTPS

nginx serverning o'zida ishlaydi. O'rnatilmagan bo'lsa:

bash

sudo apt install -y nginx certbot python3-certbot-nginx

Faervolda portlarni ochamiz:

bash

sudo ufw allow 80/tcp
sudo ufw allow 443/tcp

Konfiguratsiya faylini yaratamiz:

bash

sudo vim /etc/nginx/sites-available/gitlab.conf

Boshiga faqat HTTP blokini yozamiz — sertifikatni certbot shu blok orqali oladi:

nginx

server {
    listen 80;
    server_name gitlab.example.com;

    client_max_body_size 0;

    location / {
        proxy_pass http://127.0.0.1:8080;
        proxy_set_header Host              $host;
        proxy_set_header X-Real-IP         $remote_addr;
        proxy_set_header X-Forwarded-For   $proxy_add_x_forwarded_for;
        proxy_set_header X-Forwarded-Proto $scheme;
        proxy_read_timeout 300s;
    }
}

Faollashtiramiz:

bash

sudo ln -s /etc/nginx/sites-available/gitlab.conf /etc/nginx/sites-enabled/
sudo nginx -t && sudo systemctl reload nginx

Endi sertifikat olamiz — certbot faylni o'zi tahrirlab, 443 blokini va HTTP'dan HTTPS'ga yo'naltirishni qo'shadi:

bash

sudo certbot --nginx -d gitlab.example.com

⚠️ client_max_body_size 0 — eng ko'p vaqt yeydigan xato shu. nginx'ning standarti 1 MB, ya'ni busiz biroz kattaroq git push yoki LFS fayli 413 Request Entity Too Large bilan yiqiladi, sabab esa GitLab loglarida ko'rinmaydi.

⚠️ X-Forwarded-Proto — busiz GitLab so'rovni HTTP deb o'ylab, brauzerni cheksiz redirect'ga tushiradi.

7-qadam. Birinchi kirish va xavfsizlik

GitLab birinchi startda root uchun tasodifiy parol generatsiya qiladi:

bash

docker exec gitlab-ce grep 'Password:' /etc/gitlab/initial_root_password

Brauzerda https://gitlab.example.com ni ochib, root va shu parol bilan kiring.

⚠️ initial_root_password fayli 24 soatdan keyin avtomatik o'chiriladi. Kirgan zahotingiz parolni almashtiring: o'ng yuqoridagi avatar → Edit profile → Password.

Parolni boy bersangiz, uni konteyner ichidan tiklash mumkin:
bash
docker exec -it gitlab-ce gitlab-rake "gitlab:password:reset[root]"

Shaxsiy server bo'lsa, birinchi navbatda ochiq ro'yxatdan o'tishni yopib qo'ying — aks holda GitLab'ingizda istalgan odam hisob ochishi mumkin:

Admin Area → Settings → General → Sign-up restrictions → Sign-up enabled belgisini olib tashlang.

SSH kalitingizni qo'shgach (Edit profile → SSH Keys), klon qilish quyidagicha bo'ladi:

bash

git clone ssh://git@gitlab.example.com:2222/username/loyiha.git

8-qadam. Runner'ni ro'yxatdan o'tkazish (ixtiyoriy)

CI kerak bo'lmasa, bu qadamni o'tkazib yuboring — compose'dagi gitlab-runner servisini butunlay o'chirib tashlasangiz ham bo'ladi.

Yangi GitLab versiyalarida runner avval interfeysda yaratiladi: Admin Area → CI/CD → Runners → New instance runner. Yaratgach glrt- bilan boshlanadigan token beriladi:

bash

docker exec -it gitlab-ce-runner gitlab-runner register \
  --non-interactive \
  --url https://gitlab.example.com \
  --token glrt-XXXXXXXXXXXXXXXX \
  --executor docker \
  --docker-image alpine:3.20 \
  --docker-volumes /var/run/docker.sock:/var/run/docker.sock

Oxirgi qator job'lar ichida docker build qilish imkonini beradi. config.toml /volumes/data/gitlab-ce/runner ichida saqlanadi, ya'ni konteyner qayta yaratilsa ham yo'qolmaydi.

⚠️ Runner GitLab'ga ichki tarmoq orqali emas, https://gitlab.example.com orqali murojaat qiladi — ya'ni domen serverning o'z ichidan ham ochilishi kerak. Tekshirish:
bash
docker exec -it gitlab-ce-runner wget -qO- https://gitlab.example.com/-/health

Kundalik ish

Zaxira olish

GitLab'ning o'z backup mexanizmi bor, lekin u avtomatik ishlamaydi — buyruqni o'zingiz chaqirasiz:

bash

docker exec -t gitlab-ce gitlab-backup create

Natija /volumes/data/gitlab-ce/data/backups/ ichida .tar bo'lib yotadi. Har kuni tunda olish uchun host'da cron yozasiz:

bash

0 3 * * * docker exec -t gitlab-ce gitlab-backup create CRON=1

⚠️ Bu .tar yetarli emas. Undan tashqari /volumes/data/gitlab-ce/config/gitlab-secrets.json faylini ham saqlang: u yo'qolsa, backup'dan tiklaganingizda 2FA, CI o'zgaruvchilari va saqlangan tokenlar ochilmay qoladi.

⚠️ Zaxira serverning o'zida yotibdi. Disk yonsa, u ham ketadi — nusxasini boshqa joyga chiqarib qo'ying.

Yangilash

docker-compose.yaml dagi image tegini yangisiga almashtiring va:

bash

cd /volumes/server-stack/gitlab-ce
docker compose pull
docker compose up -d

⚠️ Major versiyalarni sakrab o'tib bo'lmaydi. GitLab 17'dan 19'ga to'g'ridan-to'g'ri sakrasangiz, migratsiyalar yiqiladi. Rasmiy yangilanish yo'lini (upgrade path) tekshirib, oraliq versiyalardan bosqichma-bosqich o'ting.

Foydali buyruqlar

Buyruq	Nima qiladi
`docker compose logs -f gitlab-ce`	loglarni jonli kuzatish
`docker exec -it gitlab-ce gitlab-ctl status`	ichki servislar holati
`docker exec -it gitlab-ce gitlab-ctl reconfigure`	konfiguratsiyani qayta qo'llash
`docker exec -it gitlab-ce gitlab-rake gitlab:check`	umumiy sog'liq tekshiruvi
`docker stats gitlab-ce`	xotira/CPU sarfi

Tez-tez uchraydigan muammolar

Belgi	Sabab	Yechim
`502 Bad Gateway`	GitLab hali ko'tarilmagan	5-10 daqiqa kuting, `docker compose logs -f gitlab-ce`
`413 Request Entity Too Large`	nginx'da `client_max_body_size`	nginx blokiga `client_max_body_size 0;` qo'shing
Cheksiz redirect	`X-Forwarded-Proto` yuborilmayapti	nginx `location` blokidagi header'ni tekshiring
GitLab bazaga ulanmayapti	`.env` dagi parol baza parolidan farq qiladi	`ALTER USER gitlab WITH PASSWORD ...`
`docker ps` da `healthy`, sayt esa 502	konteyner endigina ko'tarilgan	`curl http://127.0.0.1:8080/-/health` bilan tekshiring
`git clone ssh://...` ishlamayapti	SSH porti yopiq yoki noto'g'ri	`.env` dagi `GITLAB_SSH_PORT` va faervolni tekshiring
Konteyner OOM bilan o'ladi	RAM yetmayapti	swap yoqing yoki `puma`/`sidekiq` qiymatlarini kamaytiring

Yakuniy tekshiruv ro'yxati

Docker o'rnatilgan va docker compose version ishlaydi
/volumes tuzilmasi yaratilgan
docker-compose.yaml va .env joyida, .env ruxsati 600
docker ps da uchala konteyner ko'rinadi
curl http://127.0.0.1:8080/-/health → 200
Domen HTTPS bilan ochiladi, sertifikat amal qiladi
root paroli almashtirilgan, ro'yxatdan o'tish yopilgan
Birinchi backup olib ko'rilgan va boshqa joyga nusxalangan

Shu ro'yxatdagi hamma narsa bajarilgan bo'lsa, o'z GitLab'ingiz to'liq ishlayotgan bo'ladi.

#git #seflhost

Linux serverda GitLab'ni Docker konteynerida ishga tushirish

Nima quramiz

Talablar

1-qadam. Serverni tayyorlash

2-qadam. Docker'ni o'rnatish

2.1. Kerakli paketlar va GPG kaliti

2.2. Repozitoriyni ro'yxatga olish

2.3. Docker Engine'ni o'rnatish

2.4. Ishga tushirish va tekshirish

2.5. O'zingizni docker guruhiga qo'shish

3-qadam. Katalog tuzilmasini tashkil qilish

4-qadam. GitLab fayllarini yaratish

4.1. Kataloglar

4.2. Extension'lar uchun SQL fayl

4.3. docker-compose.yaml

4.4. .env fayli

5-qadam. Ishga tushirish

6-qadam. nginx va HTTPS

7-qadam. Birinchi kirish va xavfsizlik

8-qadam. Runner'ni ro'yxatdan o'tkazish (ixtiyoriy)

Kundalik ish

Zaxira olish

Yangilash

Foydali buyruqlar

Tez-tez uchraydigan muammolar

Yakuniy tekshiruv ro'yxati

2.5. O'zingizni `docker` guruhiga qo'shish

4.3. `docker-compose.yaml`

4.4. `.env` fayli